İy vefâsuz hâin ü bî-emn ü bî-emân felek
V’iy hatâ-perver belâ-bahş u kazâ-gerdân felek
Husrev-i sâhib-zemânlar kanın içen zulm ile
Pür-sitem pür-mihnet ü pür-derd ü pür-efgân felek
Sensin âhir tahtını viren Süleymân’un yile
Mülk-i âbâdın mülûkün eyleyen vîrân felek
Yidi yıl Eyyûb’a derd ü renc ü gam yoldaş idüp
Nûh’a kendü öz tenûrından viren tûfân felek
Gözlerinden Ya’kûb’un kan itdürüben Yûsuf’u
Geh kuyuya bırağup geh atdıran zindân felek
Matbahında zulmünün bişse ne tan yüz bin ciger
Pâyesinde kahrunun çün çarhdur kazgan felek
Mülk-i Yunan’a ser-â-ser hükm iderken âh kim
Eyledün mesken bize şimdi Firengistân felek
Yakamu yırtıp elünden nicesi âh itmeyem
Cânımu odlara atdı derd-i Oğuz Hân felek
Ağlamakdan ol ciğer-gûşem firâkından müdâm
Kara kara kanlara boyandı bahristân felek
Başuma karanulık itdün cihân aydınlığın
Kara yüzlü kara bulıtlu per-i bârân felek
Bir kılına virseler virmezdüm Oğuz Hân’umun
Genc-i Kârûn ile bin bin milket-i Osmân felek
Sînemi çâk eyle cânum hâk ü gönlüm derd-nâk
Çünki Oğuz Hân’um oldı hâk ile yeksân felek
Âh u vâveylâ dirîg ü hasret ü sad derd âh
Kim Oğuz Hân’um dahı görmeğe yok imkân felek
Kimseyi âlemde hergiz kılmamışsın şâdmân
Âh idüp ağlar elünden bende vü sultân felek
İy felek nâ-mihrsin bî-emn ü bî-emânsın
Kej-rev ü kej-şekl ü kej-âyîn ü kej-devrân felek
II
Âh elünden her zemân iy hâin ü hûn-hâr felek
Bî-bekâsın bî-safâ bî-vezn ü bî-lenger felek
Eşk-i dür-rîzim nice akup dem-âlûd olmasun
Bağrumıdeldün belâ tîğiyle iy kâfir felek
Salalıdan beni girdâb-ı Firengistân’a sen
Gözlerümden kanlu yaş deryâ gibi akar felek
Kanın içmişdür nice şehzâde-i meh-rûların
Ol sebebden geh kara geh görinür ahmer felek
Dökmedi Ya’kûb ben denlü gözinden kanlu yaş
Çekmedi ben çekdiğim zulmetde İskender felek
Gözlerüm şol denlü kan dökdi Firengistân’a kim
Bahr-i mağrîb cûşa gelmişdür taşup çağlar felek
Kudret-i Hak’dur bana iy felek senden degül
Yazılanı çünki âhir göriser her ser felek
Derd-i devrânı nice dîvân ide âşüfte dil
Gözlerüm yaşıyla gark oldı suya defter felek
Göreliden hasret ü derd ile iy Cem hâlüni
Gör nice dîvâne olmışdur semâ eyler felek
III
İy düzelmiş işleri vîrân iden azgun felek
Cem şehenşâhı murâdından kılan mağbûn felek
Kanda bir ehl-i safâ var ise virürsin belâ
Ol cihetdendür sana dirler melâl-efzûn felek
İşidel’den Şâh Oğuz Hân’un şehîd olduğını
Derd ile oldı Firengistân’da Cem mecnûn felek
Yirde bu hâl ile görmişdür beni mâtem tutar
Görme misin karalar giymişdür ay u gün felek
Cânumı yakdun u yıkdun ömrümün dîvârını
Bîd-i eyvânun yıkılsun aşağı geçsün felek
Her ki âkıldur cihâna kılmasun hiç i’tibâr
Fursatı fevt itmesün zevk ü safâ sürsün felek
Ala gözlü lâle yanaklu Frenk oğlanları
Açup ak bileklerin la’lîn kadeh sunsun felek
Ruhları gül zülfi sünbül lebleri mül sâkiler
Salınup seyr eylesün meclisde raks ursun felek
Hasret-i Sultân Oğuz Han ben Cem’i hasretleri
Câm-ı Cem’de âteşi tâsı gibi yaksun felek
Cem Sultan
